Райҳон янги қўшиқлар, ажойиб клиплар яратиш бўйича энг илғорлардан бири! Ўз  устида тиним билмай ишлайди. Манзура билан дуэт куйлади-ю, мухлисларни яна бир янгилик билан хурсанд қилди.

-"Мен бу мен” саундтреки яратилиши жуда қизиқ...

-Бу саундтрекни ёзиш чоғида Манзурани ўзим учун қайта  кашф этдим. Унинг мусикаси ва ижоди ёқади. Ишлашимизда умимийлик бор. Дуэтдошим яратган қўшиқ менга жуда ёқди. Унинг ўз ишига профессионал ёндашиши қувонтиради. Мен у билан дуэт куйлаганимдан бағоят хурсандман.

-Манзура билан дуэт куйлашга нега рози бўлдингиз?

-Аввало, бу қўшиқ фильмга саундтрекдир.  Боз устига, машҳур режиссёр Рустам Саъдиевнинг фильми. У киши билан "Келгинди келин” фильми жараёнида ишлаганмиз.  Хабарингиз бор, фильм ҳам, саундтрек ҳам омма томонидан жуда илиқ кутиб олинган. Бу режиссёр билан ишлаш жуда осон. Чунки, бир-биримизни тушунамиз. Дуэтдошим Манзура  эканлигини билишим биланоқ розилик билдирдим. Қўшиқ аранжировкасини Зафар Қодиров яратди. Манзура яратган қўшиқ иккаламиз учун ҳам кутилмаган бўлди, деб айта оламан. Поп-рокк услубидаги бу тарона менинг куйлаш дидимга ҳам яқин. Ҳеч ким ҳали куйлаб кўрмаган услубда қўшиқ куйлашни, ўзимизни синаб кўришни лозим топдик.

-Бирга ҳамкорлик қилиш жараёнида Манзурадан нималар ўргандингиз?

-Билмадим...Муҳими, бу қўшиқ ва клипда ҳар биримиз ўзлигимизни кўрсатишимиз керак эди.  

-Унинг ижоди билан қизиқасизми?

-Хонанда сифатида у менга жуда ёқади. Сўнгги пайтларда ташқи кўриниши ҳам, мусиқаси ҳам ўзгариб кетди. Ўзига хос овоз тембри ва ўз йўналишига эга хонанда. Ижодида ёрқин хослик бор.

-Манзуранинг қайси қўшиқлари сизга манзур?

-"Афсусдаман”, "Севгинатор”... Яна янги қўшиқ ёзаётган экан. Бу ҳам қизиқ.

-Концертингизни ҳаммма соғиняпти. Концертингизда энг асосий нима янгиликка қўл урмоқчисиз?

-Концертим бошидан охиригача жонли ижрода бўлиб ўтишига қарор қилдим. Ўсадиган пайт келди. Бу борада эталон- Юлдуз Усмонвага ҳавас қиламиз. Шундай даражага етиш учун интиляпман.

-Бу йил қайси таронангиз хит бўлиши мумкин?

-Тахмин қилиш қийин. Буни тингловчилар ҳал қилади. Яқинда янги таронам – "Бомбей”нинг премъераси. Мухлисларимнинг қандай кутиб олишидан ҳаяжондаман. Фурсатдан фойдаланиб  клипимда иштирок этган Жахонгир Позитлжонов, Азиз Раметов, Акбар, Ҳалимахон опага чуқур миннатдорчилик билдираман. Бу видео-клипни кўриб ҳамма хурсанд бўлишини хоҳлайман. Томошабинлар  муаммоларини унутиб, мириқиб ҳордиқ чиқаришларини истардим.

-Юқорида санаб ўтган ҳамкасбларингиз ҳам клипига таклиф килса суратга тушармидингиз?

-Албатта. Мен ҳамкорликка ҳамиша тайёрман.

-Нимадан қўрқасиз?

-Машҳур бир санъаткоримизнинг гапини эслайман. Аллоҳдан бошқа ҳеч кимдан қўрқма! Мен ҳам шунга амал қиламан.

-Швейцариялик машҳур ди-джей Ив Ларокнинг шоусида синглингиз билан бир дам кўриниб, тезда кетиб қолдингиз. Шоу ёқмадими ё ёнингиздаги айрим ҳамкасбларингиз?

-Шоу кеч бошланди. Эртаси куни суратга олиш ишлари ҳам бор эди. Устига-устак, клуб мусиқасидан бошим оғриб қолади.

-Кумирингиз Майкл Жексон қабрини зиёрат қилиш учун атайин АҚШга борганингизга айрим ҳамкасбларингиз ишонишмаяпти...

-Ишонишса-ишонишмаса аҳамияти йук. Мен унинг номи билан ўзимни реклама қилмоқчи эмасман. Кумиримга нисбатан қайғули қалб ҳиссиётларим  абадий қолади.   

-"Кечир”дан сўнг янги фильмда нега суратга тушмаяпсиз?

-Фильм ишлаш  жуда қийин жараён. Бошимдан ўтганидан кейин билдим. Энди ўзим бошқа фильм ишламасам керак. Бошқа режиссёрлар яхши сценарий таклиф килишса, роль ижро этаман.

-Концертингизда Майкл Жексондан ижодидан қандайдир қисм бўладими?

-Мен буни чин дилдан хоҳлаяпман. Томошобинлар қандай қабул қилиши қизиқ...Жексонни унутмайман.

-Шоу-бизнесимизда сўнгги пайтда сиз учун нималар қизиқ?

-Билмадим.... Бироқ, яқинда бир радиоканалда 3 ёшар болакай "Орзуингга ишон”ни маромига етказиб куйлаганини тинглаб жуда хурсанд бўлдим.