Латофатли Райҳондан унинг сўнгги янгиликлари билан қизиқдик.
Райҳон: Баҳор инжиқлари яхши-я, бироқ, ҳаммавақт ҳам эмас. Қизиқ, негадир баҳорда бераётган барча гастрол сафарларида ёмғир менга йўлдош бўляпти. 21- март Қўқонда очиқ майдонда концерт берганимда ёмғир қуйганди. Мана яқинда Андижон шаҳри стадионидаги гастрол концертимда ҳам шаррос ёмғир қуйди. Стадион минглаб мухлисларимга лиқ тўла. Илож қанча, ёмғир остида янги концерт дастуримни тақдим этишимга тўғри келди. Озгина шамоллаб ҳам қолдим. Бироқ, концерт давомидаги мухлисларим илиқлиги кайфиятимни тоғдек кўтарди. Ҳаво тўнини тескари кийганига қарамай, ҳеч ким жойидан жилгани йўқ. Ҳатто стадионга кира олмаган мухлисларим ҳам ташқарида тик туриб бўлса-да, соябон остида концертимни томоша қилишганига кўзим тушди. Мухлисларим билан кўплаб қўшиқларни жўр бўлиб, биргаликда куйладик. Бир сўз билан айтганда, водийнинг муҳаббатига гап йўқ! Май ойида Самарканд, Навоий, Ургенчда гастрол сафари уюштираман. Умид қиламанки, ёмгир ёғмайди!
-Яқинда "Севгинатор 2. Қайнона операцияси” фильми премъерасида сизни томошабин сифатида учратиб қолдик. Таассуротлар қандай?
-Манзура мени шахсан таклиф этди. Роса хурсанд бўлдим. Томошабинлар картинани катта қизиқиш билан кутиб олишганидан мен ҳам қувондим. Ростини айтсам, Манзура бош рол талқин этган "Севгинатор”дан кўра иккинчиси қизиқарли ва ажойиб чиқибди. Залдагилар мазза қилди. Молодец! Картинадаги ўзига хос юмор, ҳамкасбимнинг актрисалик қобилиятига "5” баҳо! Бу фильмда дам олиш мумкин эди: оз бўлса-да, томошабинларнинг ҳаёт ташвишларини унутиб, тушкун кайфиятдан узоқлаштиришга кўмак берди.
-Кези келиб, Манзура ва Райҳон бир фильмда бош роллар талқин қилиши мумкинми?
-Нимага йўқ?! Манзурани яқиндан била бошлаганимдан сўнг унга бўлган ҳурматим чексизликка туташяпти. "Мен бу мен” қўшиғини бирга ёзиш асносида амин бўлдимки, у инсон сифатида жуда яхши хислатларга эга, хонанда сифатида жуда профессионал. Мен у билан ижодий ҳамкорлик қилишга ҳамиша тайёрман. Биргаликда фильмда суратга тушиш мухлисларимиз учун ажойиб янгилик бўлса, ажабмас!
