“Реал” клубида иккинчи президентилик даврини бошлаган Флорентино Перес трансфер оламида янги шов-шувни юзага чиқарди. Сал аввал “Милан” вакили Какани 67,2 миллион евро эвазига Мадридга олиб келган Перес энди азалий орзусини амалга оширди. Яъни, “Манчестер Юнайтед” клубининг португалиялик ярим ҳимоячиси Криштиан Роналдуга 94 миллион евро таклиф қилди ва бунга ижобий жавоб олди. МЮ клуби ҳам ушбу хабарни тасдиқлади. Клуб расмий интернет сайтида 80 миллион фунт-стерлинг (94 миллион евро) таклифни қабул қилинганлиги қуйидагича ошкор қилинди:
“Клубимиздан кетмоқчилигини маълум қилган Криштиан Роналду учун “Реал” клубининг 80 миллион фунт-стерлинглик таклифи бошқарув кенгашимиз томонидан қабул қилинди. Футболчимиз ва менежерларимиз трансфер борасида энди бемалол келишув амалга оширишлари мумкин”.