Ўтган йили «Francefotball» нашри юқоридаги сарлавҳа остида мақола чоп этган эди. Франциялик ҳамкасбларимизнинг анъанасини давом эттирган ҳолда биз ҳам келаётган ёзги трансферда амалга ошиши мумкин бўлган «ўтиш»ларнинг кучли ўнлигини эътиборингизга ҳавола этмоқдамиз.
1. Давид ВИЛЬЯ
Қаердан: «Валенсия»
Қаерга: «Барселона»
Трансфер суммаси: 40 миллион евро
Испания терма жамоаси ҳужумчиси учун Европанинг топ-клублари ўртасидаги кураш бир неча йиллардан бери давом этаётган бўлса-да, ҳар йили қандайдир келишмовчиликлар туфайли Вильянинг трансфери амалга ошмай қолаётганди. Ўтган йили Мадриднинг «Реал»и футболчини ўзиники қилиб олишга жуда ҳам яқин келганди. Лекин ўшанда валенсияликлар нима учундир ҳужумчини «Қироллик клуби»га беришни хоҳламади. Бу мавсум ҳам клублар ўртасида Вилья учун кураш анча кескин тус олди. Ҳужумчига харидор бўлган «Челси», «Реал» ва «Барселона» жамоалари ичида Иброҳимовичнинг ўйинидан кўнгли тўлмаётган каталонияликлар «улоқни илиб кетишди». Улар ўтган ҳафта «Валенсия» футболчисини ўз таркибларига қўшиб олишди. Албатта, «Барса»га омад кулиб боқишида Вильянинг ҳам ҳиссаси катта. Чунки футболчининг ўзи каталонияликлар билан бир сафда туришни анчадан бери истаётганини ҳеч кимдан яширмаётганди.
2. Фернандо ТОРРЕС
Қаердан: «Ливерпуль»
Қаерга: «Челси», «Манчестер Сити»
Тахминий трансфер суммаси: 70 миллион фунт стерлинг
Яқиндагина якунига етган мавсумда «Ливерпуль» Европа Чемпионлар лигасига йўлланма берувчи ўринлардан қуруқ қолди. Бу эса клуб доирасидаги еврокубокларда ҳали бирор натижага эришмаган Фернандонинг бошқа жамоага ўтиши мумкинлигини кўрсатмоқда. Ҳозирда «Эл-Ниньо»га «Челси» ва «Манчестер Сити» клублари кўз тикишган. Ҳатто «аристократлар» раҳбарияти Торрес учун Англия премьер лигаси трансферида ҳали қайд этилмаган рекорд сумма — 70 миллион фунт стерлинг таклиф этмоқда. Аммо Фернандо бу таклифларнинг бирортасига ижобий жавоб бермаяпти. Ундан бошқа жамоага ўтиш ёки ўтмаслиги ҳақида сўрашганида у шунчаки: «Мен ҳозир келаси мавсумни қайси жамоада давом эттириш ҳақида ўйламаяпман. Бутун эътиборим ҳозир Испания терма жамоасига қаратилган», дея жавоб қайтарди. Балки Торрес мундиалда ўзини янада ёрқинроқ намоён этиб, бошқа грандларнинг ҳам эътиборини қозонишни ният қилгандир. Лекин ҳар нима бўлганда ҳам, 26 ёшли испан йигитини қўлга киритган клуб футболчи ёрдамида ўз ўйинини анча кучайтириши аниқ.
3. Сеск ФАБРЕГАС
Қаердан: «Арсенал»
Қаерга: «Барселона»
Тахминий трансфер суммаси: 45 миллион евро
Футболчи бўлиб эсини таниганидан бери доимо юлдузлар қаторида тилга олинувчи Сеск Фабрегас 2008 йилги Европа чемпионатида ғалаба қозонганлигини ҳисобга олмасак, ҳали бошқа юлдузлар қўлга киритган совринларнинг бирортасига эга бўлгани йўқ. Бу ҳолат футболчининг жонига теккан кўринади. Фабрегас анчадан бери «Арсенал»дан кетишни ўйлаб юрибди. Унга ҳозирда энг асосий даъвогар футболчи фаолиятини бошлаган «Барселона» жамоаси. Фабрегас ҳам келаётган мавсумда каталонияликлар сафида ҳаракат қилишни чин дилидан истамоқда. Лекин лондонликлар жамоа сардорини бошқа клубга бериб юборишга тиш-тирноқлари билан қарши туриб олишган. Шу сабабли ушбу трансфер бугунги кун нашрларининг асосий мавзусига айланиб улгурди. Ана ўша нашр ларда мазкур «ўтиш» ҳақида фикр билдирганларнинг кўпчилиги Фабрегаснинг «Барса»га ўтиши футболчига омад келтирмайди, деб ҳисобламоқда. Чунки бундан аввалги «Арсенал»дан «Барселона» таркибига келиб қўшилган Глеб ҳамда Анрилар Каталония клубига у қадар мослаша олмаган эдилар. Бироқ шуниси ҳам борки, Фабрегас ўзининг собиқ жамоадошларидан фарқли ўлароқ, испан футболи ҳавосини жуда яхши билади ва асосийси, термадаги шериклари билан ажойиб тандем ҳосил қилиб, очилмаган қирраларини ҳам намоён этиши мумкин.
4. Златан ИБРОҲИМОВИЧ
Қаердан: «Барселона»
Қаерга: «Манчестер Сити», «Челси», «Юве»
Тахминий трансфер суммаси: аниқ айтилмаган
Жамоага Вилья келиб қўшилгач, «Барселона» таркибида мавсумни у қадар кўтаринки руҳда ўтказмаган Златан фаолиятини келаси мавсумда бошқа жамоа сафида ўтказиши ҳақиқатга яқин бўлиб бормоқда. Футболчи учун ҳозирда «Челси», «Ювентус» ва тўп тепган инсон зоти борки ҳаммасини ўзиники қилиб олишга уринаётган «Манчестер Сити» жамоалари кураш олиб боришмоқда. Бу жамоалар ичида туринликларнинг қўли баланд келишини тахмин қилиш қийин эмас. Сабаби футболчи ўзининг гуллаган даврларини айнан мана шу жамоа сафида ўтказган. Иброҳимовичнинг Апеннин ярим оролига қайтиши мухлисларнинг «А» серияга бўлган қизиқишини орттириш баробарида, «Ювентус»нинг яна Европа футболида катта саҳнага чиқишига ёрдам бериши мумкин.
5. Давид СИЛЬВА
Қаердан: «Валенсия»
Қаерга: «Реал», «Ливерпуль», «Манчестер Юнайтед», «Барселона»
Тахминий трансфер суммаси: 40 миллион евро
«Валенсия» сафида доимо бир-бирини қўллаб келган икки Давид — Вилья ва Сильва келаётган мавсумда ашаддий рақибларга айланиш эҳтимоли юқори. Сабаби валенсияликларнинг иккинчи Давиди янги мавсумни «Реал» таркибида бошлаши мумкин. Тўғри, футболчига «Ливерпуль», «Манчестер Юнайтед» ва борган сари Испания терма жамоасига айланиб бораётган «Барселона» ҳам анчадан бери қизиқиш билдирмоқда. Шундай бўлса-да, ярим ҳимоячининг «Қироллик клуби»га ўтиши ҳақиқатга яқинроқ. Чунки анча вақтдан бери кўзлаб юрган мақсади Вильяни азалий рақибига бериб қўйган «Реал» энди Сильвани қўлдан чиқармаслик учун жон-жаҳди билан курашади. Сильванинг ўзи эса Англия жамоаларида ўйнашга у қадар рўйхушлик бераётгани йўқ. У Испанияда қолишни маъқул кўрмоқда. Ҳозирда «Реал» ва «Валенсия»нинг бир тўхтамга кела олмаётганининг асосий сабаби футболчининг трансфер баҳоси. «Қироллик клуби» испаниялик хавбек учун 30 миллион евро беришни режалаштирган. Валенсияликлар эса Сильвани бериб юбориш учун бу сумма камлик қилади, деб ҳисоблашмоқда.
Агар мазкур трансфер амалга ошадиган бўлса, келаси йилги Чемпионлар лигасида икки қанотидан айрилган «кўршапалаклар» узоққа «уча олмаслиги мумкин».
6. Франк РИБЕРИ
Қаердан: «Бавария»
Қаерга: «Барселона», «Реал», «Манчестер Юнайтед», «Манчес тер Сити»
Тахминий трансфер суммаси: 50 миллион евро
Француз футболчисини қўлга киритиш учун Европанинг бир қатор грандлари — «Барселона», «Реал», «Манчестер Юнайтед» ва «Манчестер Сити» жамоалари навбатда туришибди. Бу жамоалар орасида «қизил иблис лар»нинг имконияти юқори, дея баҳоланмоқда. Чунки ҳозирда «Барса» асосий эътиборини Фабрегасга қаратган, «Қироллик клуби» эса Сильва билан битим тузиш арафасида. «Бавария» сафида Еврокубокларга эриша олмаётган Франк Чемпионлар лигасига чиқа олмаган «Манчестер Сити» таркибига ўтмаслиги аниқ. Шу боис француз учун энг маъқул вариант «Манчестер Юнайтед». «Юнайтед» учун ҳам Рибери ниҳоятда зарур. Фергюсон Роналдуни «Реал»га бериб юборганидан кейин унинг ўрнини ҳар қанча ёпишга ҳаракат қилмасин, барибир фойдаси бўлмади. Ўйлашимизча, франциялик вингернинг манчестерликлар сафига бориб қўшилиши ўтган мавсумни бир текисда олиб бора олмаган «қизил иблислар»нинг келаси мавсумда даҳшатли жамоага айланишига сабаб бўлади.
7. Паоло ЭНРИКЕ
Қаердан: «Сантос»
Қаерга: «Бавария», «Манчестер Юнайтед», «Милан»
Тахминий трансфер суммаси: 40 миллион евро
20 ёшли вундеркиндни ҳали европаликлар унчалик яхши танишмайди. Аммо бразилияликлар учун Энрике ниҳоятда қадрли футболчига айланиб бўлган. Бежизга уни ватанида «Янги Кака» деб аташмайди. Ҳужумкор ярим ҳимоячи ўзининг майдондаги ҳаракатлари билан кўп жиҳатдан Какани эслатиб юборади. Ҳозирда «Сантос» жамоаси ярим ҳимоячисини ўз сафларига қўшиб олиш ниятида «Манчестер Юнайтед», «Бавария» ва «Милан» клублари кураш бошлаб юборишган. Айниқса, ўз Какасини «Реал»га бериб юбориб, мавсумни ниҳоятда бўш ўтказган «Милан» жамоаси «Янги Кака»ни қўлга киритиш учун астойдил енг шимармоқда. Миланликлар Энрике билан жамоадаги камчиликларни ёпиш мақсадида «Сантос» клуби билан боғланишга ҳам улгурган. Аммо ҳозирда «Сантос» клуби футболчисини сотиш ҳақида у қадар қатъий қарор қабул қилганича йўқ. Ўйлашимизча, Энрикенинг Европага келиши кўҳна қитъа футболига катта янгилик олиб келиши мумкин.
8. Карлос ТЕВЕС
Қаердан: «Манчестер Сити»
Қаерга: «Реал», «Интер»
Тахминий трансфер суммаси: 40 миллион евро
Ҳали Англия чемпионати якунига етмаган маҳалда «Реал» жамоасининг таклифига нисбатан «Менга бундай гап-сўзлар умуман қизиқ эмас. «Реал» ҳақида ўйлаётганим йўқ. Ҳозирда «Манчестер Сити»га Чемпионлар лигасида иштирок этиш ҳуқуқини берувчи ўринлардан бирини эгаллашга ёрдам бермоқчиман», дея жавоб қайтарган Тевес жамоаси йўлланмадан қуруқ қолгач, энди «Реал» қолиб бошқа жамоаларнинг ҳам таклифини чуқур ўйлаб кўраётган бўлса керак. Ҳозирда футболчига «Реал» ва «Интер» жамоалари астойдил қизиқиш билдирмоқда. Лекин жаҳон чемпионатидан сўнг футболчи учун курашга бошқа жамоалар ҳам қўшилиши мумкин. Чунки жаҳон биринчилигида Аргентина терма жамоасининг имконияти жуда юқори, дея баҳоланмоқда. Одатда бундай нуфузли мусобақалардан кейин клублар яхши ўйин кўрсатган жамоаларнинг футболчиларига ёппасига «ҳужум»га ўтишади.
9. Леонель МЕССИ
Қаердан: «Барселона»
Қаерга: «Реал»
Тахминий трансфер суммаси: 200 миллион евро
Дунёнинг биринчи рақамли футболчисини ўз жамоасига олиб келиш учун бу мавсумда ҳеч қайси жамоа «юрак ютиб» каталонияликларга мурожаат эта олмаса керак. Чунки «Барса»нинг тимсолига айланиб улгурган футболчининг бошқа жамоага ўтишини ҳозирда энг хаёлпарст одам ҳам тасаввур қила олмайди. Лекин Криштиану ва Какаларнинг ҳам ҳеч ким Мадридга биргаликда келишига ишонмай турган вақтда барчасини амалга ошира олган Флорентино Перес бу сафар ҳам ҳаммани ҳайратга солиш ниятида. Ўз мақсадидан чекинмайдиган Перес нима қилиб бўлса-да, Мессини жамоасига олиб келиш «ишқида ёнмоқда». У ҳатто футболчи учун каталонияликларга ҳали бирор бир футболчининг трансферида учрамаган рекорд сумма, рекорд сумма уёқда турсин, мегарекорд сумма 200 миллион евро таклиф этди. «Барселона» эса ҳали бу борада ҳеч қандай фикр билдиргани йўқ. Агар ҳамма тахмин қилганидай келаётган жаҳон чемпионатида Месси биринчи бўла олса, Переснинг қарори ўта қатъийлашиши турган гап. Қани кутамиз. Месси келаси мавсумни қайси жамоа да бошлар экан. Агар у ростдан ҳам «Реал» таркибига ўтса, биз Европа футболида ҳақиқий ағдар-тўнтарни кўришимиз мумкин.
10. Жозе МОУРИНЬО
Қаердан: «Интер»
Қаерга: «Реал»
Жозе Моуриньонинг исмини ўқиб, ҳайрон бўлаётгандирсиз. Футболчилар ҳақида гап бораётганда мураббийга нима бор, дея. Лекин сарлавҳамизда айтганимиз Европа футболини ағдар-тўнтар қилиб юборишга, бизнингча, юқоридаги тўққиз футболчидан ҳам кўра мана шу мураббий кўпроқ қодир ҳисобланади. Тўғриси, буни тахмин қилиб гапиришнинг ўзи ғалати. Чунки Моуриньо шу мавсумнинг ўзидаёқ кўҳна қитьа футболини ағдар-тўнтар қилиб бўлди. Енгиш мумкин эмас, деб ҳисобланаётган жамоаларни енгди, майдонни мағрур тарк этишга ўрганганларнинг бошини эгди, йиғламаган футболчиларни йиғлатди, охирида эса ўзи ҳам йиғлади (қувончдан, албатта). Хуллас, Жозе нима қилса, қилиб ташлади Европа футболини. Энди у Испанияга, «Қиролик клуби»га ўзи ағдар-тўнтар қилиб ташлаган футболда яна бошқа янгиликни яратиш учун йўл олмоқда. Биз эса унинг Испаниядаги фаолиятини кузатиб қоламиз. У қандай янгиликларга қўл уради, буни тасаввур қила олмаймиз. Чунки Моуриньо ҳеч кимга ўхшамайдиган шахс. Ҳеч кимга ўхшамайдиган шахснинг режалари келажакда қандай бўлиши мумкинлигини эса ҳеч ким айтиб бера олмайди.
|
